Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. et patriam laudat miserando in uulnere dextram.
  2. illa est, quae Thybrim, quae fregit Lydia bella,
  3. nondum passa marem, qualis optabit habere
  4. quondam Roma uiros, contemptrix Cloelia sexus.’
  5. cum subito aspectu turbatus Scipio poscit,
  6. quae poenae causa, et qui sint in crimine manes,
  7. tum uirgo: ‘Patrios fregit quae curribus artus
  8. et stetit adductis super ora trementia frenis,
  9. Tullia non ullos satis exhaustura labores
  10. ardenti Phlegethonte natat. fornacibus atris
  11. fons rapidus furit atque ustas sub gurgite cautes
  12. egerit et scopulis pulsat flagrantibus ora.
  13. illa autem, quae tondetur praecordia rostro
  14. alitis (en quantum resonat plangentibus alis
  15. armiger ad pastus rediens Iouis!), hostibus arcem
  16. uirgo, immane nefas, adamato prodidit auro
  17. Tarpeia et pactis reserauit claustra Sabinis.
  18. iuxta (nonne uides? neque enim leuiora domantur
  19. delicta) inlatrat ieiunis faucibus Orthrus,
  20. armenti quondam custos immanis Hiberi,