Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. ‘Lux Italum, cuius spectaui Martia facta
  2. multum uno maiora uiro, descendere nocti
  3. atque habitanda semel subigit quis uisere regna?’
  4. cui contra talis effundit Scipio uoces:
  5. ‘Armipotens ductor, quam sunt tua fata per urbem
  6. lamentata diu! quam paene ruentia tecum
  7. traxisti ad Stygias Oenotria tecta tenebras.
  8. tum tibi defuncto tumulum Sidonius hostis
  9. constituit laudemque tuo quaesiuit honore.’
  10. dumque audit lacrimans hostilia funera Paulus,
  11. ante oculos iam Flaminius, iam Gracchus et aegro
  12. absumptus Cannis stabat Seruilius ore.
  13. Appellare uiros erat ardor et addere uerba,
  14. sed raptabat amor priscos cognoscere manis.
  15. nunc meritum saeua Brutum immortale securi
  16. nomen, nunc superos aequantem laude Camillum,
  17. nunc auro Curium non umquam cernit amicum.
  18. ora Sibylla docet uenientum et nomina pandit.
  19. hic fraudes pacis Pyrrhumque a limine portae
  20. reiecit uisus orbus, tulit ille ruentem