Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. ‘ante urbes standi Graias, oblite tuorum
  2. factorum miles? quis erit modus? Alpibus astat
  3. nimirum maior moles, et scandere caelum
  4. pulsantis iubeo scopulos. quamquam altera detur
  5. si similis tellus, aliaeque repente sub astra
  6. exsurgant rupes, non ibis et arduus arma
  7. me ducente feres? tene heu Cumanus hiantem
  8. agger adhuc murusque tenet Gracchusue, moueri
  9. non ausus portis? paruo in discrimine cerno
  10. ---
  11. an uobis gentes quaecumque labore parastis
  12. casu gesta putent? per uos Tyrrhena fauentum
  13. stagna deum, per ego et Trebiam cineresque Sagunti
  14. obtestor, dignos iam uosmet reddite uestra
  15. quam trahitis fama et reuocate in pectora Cannas.’
  16. Sic ductor fessas luxu attritasque secundis
  17. erigere et uerbis temptabat sistere mentes.
  18. atque hic perlustrans aditus fulgentia cernit
  19. arcis templa iugo, quorum tum Virrius, altae
  20. immitis ductor Capuae, primordia pandit.