Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. Ianiculum incumbens urbi. mox pace probata
  2. compressere odia, et positum cum foedere bellum,
  3. obsidibusque obstricta fides. mansuescere corda
  4. nescia, pro superi! et nil non immite parata
  5. gens Italum pro laude pati: bis Cloelia senos
  6. nondum complerat primaeui corporis annos,
  7. una puellarum Laurentum et pignora pacis
  8. inter uirgineas regi tramissa cateruas.
  9. facta uirum sileo. rege haec et foedere et annis
  10. et fluuio spretis mirantem interrita Thybrim
  11. tranauit, frangens undam puerilibus ulnis.
  12. cui si mutasset sexum natura, reuerti
  13. forsan Tyrrhenas tibi non licuisset in oras,
  14. Porsena. sed iuueni, ne sim tibi longior, hinc est
  15. et genus et clara memorandum uirgine nomen.’
  16. Talia dum pandit, uicinus parte sinistra
  17. per subitum erumpit clamor. permixta ruina
  18. inter et arma uirum et lacerata cadauera Pauli
  19. eruerant corpus media de strage iacentum.