Epigrammata

Martial

Martial. M. Valerii Martialis Epigrammata. Heraeus, Wilhelm, editor; Borovskij, Jacobus, editor. Stuttgart: Teubner, 1925. Reprinted with corrections in 1976.

  1. Gratum munus erit scisso nec inutile ventri,
  2. Si clara Stephani balnea luce petes.
  1. Dux lanterna viae clusis feror aurea flammis,
  2. Et tuta est gremio parva lucerna meo.
  1. Cornea si non sum, numquid sum fuscior? aut me
  2. Vesicam, contra qui venit, esse putat?
  1. Ebria nos madidis rumpit tibicina buccis:
  2. Saepe duas pariter, saepe monaulon habet.
  1. Quid me conpactam ceris et harundine rides?
  2. Quae primum structa est fistula talis erat.
  1. Defuerit si forte puer soleasque libebit
  2. Sumere, pro puero pes erit ipse sibi.
  1. Taurino poteras pectus constringere tergo:
  2. Nam pellis mammas non capit ista tuas.
  1. Lambere quae turpes prohibet tua prandia muscas,
  2. Alitis eximiae cauda superba fuit.
  1. Sordida si flavo fuerit tibi pulvere vestis,
  2. Colligat hunc tenui verbere cauda levis.
  1. Peccantis famuli pugno ne percute dentes:
  2. Clara Rhodos coptam quam tibi misit edat.
  1. Si vis esse satur, nostrum potes esse Priapum:
  2. Ipsa licet rodas inguina, purus eris.
  1. Iste tibi faciet bona Saturnalia porcus,
  2. Inter spumantes ilice pastus apros.
  1. Qui venit botulus mediae tibi tempore brumae,
  2. Saturni septem venerat ante dies.
  1. Psittacus a vobis aliorum nomina discam:
  2. Hoc didici per me dicere caesar have.
  1. Corve salutator, quare fellator haberis?
  2. In caput intravit mentula nulla tuum.
  1. Flet Philomela nefas incesti Tereos, et quae
  2. Muta puella fuit, garrula fertur avis.
  1. Pica loquax certa dominum te voce saluto:
  2. Si me non videas, esse negabis avem.
  1. Si tibi talis erit, qualem dilecta Catullo
  2. Lesbia plorabat, hic habitare potest.
  1. Artis ebur medicae narthecia cernis: habebis
  2. Munera, quae cuperet Paccius esse sua.
  1. Ludite lascivi, sed tantum ludite, servi:
  2. Haec signata mihi quinque diebus erunt.
  1. Invisae nimium pueris grataeque magistris,
  2. Clara Prometheo munere ligna sumus.
  1. Ne mendica ferat barbati prandia nudi
  2. Dormiat et tetrico cum cane, pera rogat.
  1. In pretio scopas testatur palma fuisse.
  2. Otia sed scopis nunc analecta dedit.
  1. Defendet manus haec scapulas mordente molesto
  2. Pulice, vel si quid pulice sordidius.
  1. Ne toga barbatos faciat vel paenula libros,
  2. Haec abies chartis tempora longa dabit.
  1. Nomina dat spondae pictis pulcherrima pinnis
  2. Nunc Iunonis avis, sed prius Argus erat.
  1. Stragula succincti venator sume veredi:
  2. Nam solet a nudo surgere ficus equo.
  1. Accipe lunata scriptum testudine sigma.
  2. Octo capit; veniat quisquis amicus erit.
  1. Femineam nobis cherson si credis inesse,
  2. Deciperis: pelagi mascula praeda sumus.
  1. Accipe felices, Atlantica munera, silvas:
  2. Aurea qui dederit dona, minora dabit.
  1. Non sum crispa quidem nec silvae filia Maurae,
  2. Sed norunt lautas et mea ligna dapes.
  1. Grandia taurorum portant qui corpora, quaeris,
  2. An Libycas possint sustinuisse trabes?
  1. Puncta notis ilex et acuta cuspide clusa
  2. Saepe redemptoris prodere furta solet.
  1. Non est ista recens nec nostri gloria caeli:
  2. Primus in his Mentor, dum facit illa, bibit.
  1. Nos sumus audacis plebeia toreumata vitri,
  2. Nostra neque ardenti gemma feritur aqua.
  1. Quamvis Callai+co rubeam generosa metallo,
  2. Glorior arte magis: nam Myos iste labor.
  1. Vilia sutoris calicem monimenta Vatini
  2. Accipe; sed nasus longior ille fuit.
  1. Grandia ne viola parvo chrysendeta mullo:
  2. Ut minimum, libras debet habere duas.
  1. Arretina nimis ne spernas vasa monemus:
  2. Lautus erat Tuscis Porsena fictilibus.
  1. Barbara de pictis veni bascauda Britannis;
  2. Sed me iam mavolt dicere Roma suam.
  1. Si non ignotast docti tibi terra Catulli,
  2. Potasti testa Raetica vina mea.