Epigrammata

Martial

Martial. M. Valerii Martialis Epigrammata. Heraeus, Wilhelm, editor; Borovskij, Jacobus, editor. Stuttgart: Teubner, 1925. Reprinted with corrections in 1976.

  1. Misce, Dindyme, sed frequentiores:
  2. Possum nil ego sobrius; bibenti
  3. Succurrent mihi quindecim poetae.
  4. Da nunc basia, sed Catulliana:
  5. Quae si tot fuerint, quot ille dixit,
  6. Donabo tibi Passerem Catulli.
  1. Iam certe stupido non dices, Paula, marito,
  2. Ad moechum quotiens longius ire voles,
  3. 'Caesar in Albanum iussit me mane venire,
  4. Caesar Circeios.' Iam stropha talis abi=t.
  5. Penelopae licet esse tibi sub principe Nerva:
  6. Sed prohibet scabies ingeniumque vetus.
  7. Infelix, quid ages? aegram simulabis amicam?
  8. Haerebit dominae vir comes ipse suae,
  9. Ibit et ad fratrem tecum matremque patremque.
  10. Quas igitur fraudes ingeniosa paras?
  11. Diceret hystericam se forsitan altera moecha
  12. In Sinuessano velle sedere lacu.
  13. Quanto tu melius, quotiens placet ire fututum,
  14. Quae verum mavis dicere, Paula, viro!