Saturae

Juvenal

Juvenal. Juvenal and Persius. Ramsay, G. G., editor. London, New York: William Heinemann, G. P. Putnam's Sons, 1918.

  1. provocat a domina factus spado, dormiat ille
  2. cum domina, sed tu iam durum, Postume, iamque
  3. tondendum eunucho Bromium committere noli.
  4. Si gaudet cantu, nullius fibula durat
  5. vocem vendentis praetoribus, organa semper
  6. in manibus, densi radiant testudine tota
  7. sardonyches; crispo numerantur pectine chordae,
  8. quo tener Hedymeles operas dedit: hunc tenet, hoc se
  9. solatur, gratoque indulget basia plectro.
  10. quaedam de numero Lamiarum ac nominis Appi
  11. et farre et vino Ianum Vestamque rogabat,
  12. an Capitolinam deberet Pollio quercum
  13. sperare et fidibus promittere, quid faceret plus
  14. aegrotante viro, medicis quid tristibus erga
  15. filiolum? stetit ante aram nec turpe putavit
  16. pro cithara velare caput dictataque verba
  17. pertulit, ut mos est, et aperta palluit agna.
  18. dic mihi nunc quaeso, die, antiquissime divom,
  19. respondes his, Iane pater? magna otia caeli;
  20. non est, quod video, non est quod agatur aput vos.