Saturae

Juvenal

Juvenal. Juvenal and Persius. Ramsay, G. G., editor. London, New York: William Heinemann, G. P. Putnam's Sons, 1918.

  1. nec puer Iliacus formosa nec Herculis uxor
  2. ad cyathos, et iam siccato nectare tergens
  3. bracchia Vulcanus Liparaea nigra taberna.
  4. prandebat sibi quisque deus, nec turba deorum
  5. talis ut est hodie, contentaque sidera paucis
  6. numinibus miserum urguebant Atlanta minori
  7. pondere, nondum aliquis[*](aliquis is read by Ψ, but omitted by P. Housman conjectures imi. See Journal of Phil. No. 67, p. 42.) sortitus triste profundi
  8. imperium, aut Sicula torvos cum coniuge Pluton,
  9. nec rota nec Furiae nec saxum aut vulturis atri
  10. poena, sed infernis hilares sine regibus umbrae.
  11. inprobitas illo fuit admirabilis aevo,
  12. credebant quo grande nefas et morte piandum,
  13. si iuvenis vetulo non adsurrexerat et si
  14. barbato cuicumque puer, licet ipse videret
  15. plura domi fraga et maiores glandis acervos;
  16. tam venerabile erat praecedere quattuor annis,
  17. primaque par adeo sacrae lanugo senectae.
  18. Nunc si depositum non infitietur amicus,
  19. si reddat veterem cum tota aerugine follem,
  20. prodigiosa fides et Tuscis digna libellis,