Saturae

Juvenal

Juvenal. Juvenal and Persius. Ramsay, G. G., editor. London, New York: William Heinemann, G. P. Putnam's Sons, 1918.

  1. quaeque coronata lustrati debeat agna.
  2. egregium sanctumque virum si cerno, bimembri
  3. hoc monstrum puero et miranti[*](So Ψ and Housman: Büch. follows the mirandis of P.) sub aratro
  4. piscibus inventis et fetae comparo mulae,
  5. sollicitus, tamquam lapides effuderit imber
  6. examenque apium longa consederit uva
  7. culmine delubri, tamquam in mare fluxerit amnis
  8. gurgitibus mitis et lactis vertice torrens.
  9. Intercepta decem quereris sestertia fraude
  10. sacrilega. quid si bis centum perdidit alter
  11. hoc arcana modo? maiorem tertius illa
  12. summam, quam patulae vix ceperat angulus arcae?
  13. tam facile et pronum est superos contemnere testes,
  14. si mortalis idem nemo sciat! aspice quanta
  15. voce neget, quae sit ficti constantia vultus:
  16. per Solis radios Tarpeiaque fulmina iurat
  17. et Martis frameam et Cirrhaei spicula vatis,
  18. per calamos venatricis pharetramque puellae
  19. perque tuum, pater Aegaei Neptune, tridentem;
  20. addit et Herculeos arcus hastamque Minervae,