Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. duc portus urbesque tuas. te praeside noscat,
  2. unde paludosi fecunda licentia Nili,
  3. cur vada desidant et ripa coerceat undas
  4. Cecropio stagnata luto, cur invida Memphis,
  5. curve Therapnaei lasciviat ora Canopi,
  6. cur servet Pharias Lethaeus ianitor aras,
  7. vilia cur magnos aequent animalia divos;
  8. quae sibi praesternat vivax altaria Phoenix,
  9. quos dignetur agros aut quo se gurgite Nili
  10. mergat adoratus trepidis pastoribus Apis.
  11. duc et ad Emathios manes, ubi belliger urbis
  12. conditor Hyblaeo perfusus nectare durat,
  13. anguiferamque domum, blando qua mersa veneno [*]()
  14. Actias Ausonias fugit Cleopatra catenas.
  15. usque et in Assyrias sedes mandataque castra
  16. prosequere et Marti iuvenem, dea, trade Latino,
  17. nec novus hospes erit: puer his sudavit in arvis
  18. notus adhuc tantum maioris lumine [*]() clavi,
  19. iam tamen et turmas facili praevertere gyro
  20. fortis et Eoas iaculo damnare sagittas.