Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. excludunt radios silvis demissa vetustis
  2. frigora, perspicui vivunt in marmore fontes.
  3. nec servat natura vices: hic Sirius alget,
  4. bruma tepet versumque domus sibi temperat annum.
  5. Exsultat visu tectisque potentis alumnae
  6. non secus alma Venus, quam si Paphon aequore ab alto
  7. Idaliasque domos Erycinaque templa subiret.
  8. tunc ipsam solo reclinem adfata cubili:
  9. ‘Quonam hic usque sopor vacuique modestia lecti,
  10. o mihi Laurentes inter dilecta puellas?
  11. quis morum fideique modus? numquamne virili
  12. summittere iugo? veniet iam tristior aetas.
  13. exerce formam et fugientibus utere donis,
  14. non ideo tibi tale decus vultusque superbos
  15. meque dedi, viduos ut transmittare per annos
  16. ceu non cara mihi. satis o nimiumque priores
  17. despexisse procos, etenim hic tibi sanguine toto
  18. deditus unam omnes inter miratur amatque
  19. nec formae nec stirpis egens, nam docta per urbem
  20. carmina qui iuvenes, quae non didicere puellae?