Tristia

Ovid

Ovid: Tristia. Ponto. Wheeler, Arthur Leslie, editor. Cambridge, MA; London, UK: Harvard University Press; William Heinemann Ltd., 1939 (printing).

  1. fas prohibet Latio quemquam de sanguine natum
  2. Caesaribus salvis barbara vincla pati.
  3. perdiderint cum me duo crimina, carmen et error,
  4. alterius facti culpa silenda milli'.
  5. nam non sum tanti, renovem ut tua vulnera. Caesar,
  6. quem nimio plus est indoluisse semel.
  7. altera pars superest, qua turpi carmine factus
  8. arguor obsceni doctor adulterii,
  9. fas ergo est aliqua caelestia pectora falli,
  10. et sunt notitia multa minora tua;
  11. utque deos caelumque simul sublime tuenti
  12. non vacat exiguis rebus adesse Iovi,
  13. de te pendentem sic dum circumspicis orbem,
  14. effugiunt curas inferiora tuas.
  15. scilicet imperii princeps statione relicta
  16. imparibus legeres carmina facta modis?
  17. non ea te moles Romani nominis urguet,
  18. inque tuis umeris tam leve fertur onus,
  19. lusibus ut possis advertere numen ineptis,
  20. excutiasque oculis otia nostra tuis.