Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. unde solet nubes latis inducere terris,
  2. unde movet tonitrus vibrataque fulmina iactat.
  3. Sed neque quas posset terris inducere nubes
  4. tunc habuit, nec quos caelo demitteret imbres.
  5. Intonat et dextra libratum fulmen ab aure
  6. misit in aurigam pariterque animaque rotisque
  7. expulit et saevis compescuit ignibus ignes.
  8. Consternantur equi et saltu in contraria facto
  9. colla iugo eripiunt abruptaque lora relinquunt.
  10. Illic frena iacent, illic temone revulsus
  11. axis, in hac radii fractarum parte rotarum,
  12. sparsaque sunt late laceri vestigia currus.
  13. At Phaethon rutilos flamma populante capillos,
  14. volvitur in praeceps longoque per aera tractu
  15. fertur, ut interdum de caelo stella sereno
  16. etsi non cecidit, potuit cecidisse videri.
  17. Quem procul a patria diverso maximus orbe
  18. excipit Eridanus fumantiaque abluit ora.