Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. fitque color primo turbati fluminis imbre
  2. purgaturque mora; tum moles tacta dehiscit,
  3. vivaque per rimas proceraque surgit harundo,
  4. osque cavum saxi sonat exsultantibus undis:
  5. miraque res, subito media tenus exstitit alvo
  6. incinctus iuvenis flexis nova cornua cannis,
  7. qui, nisi quod maior, quod toto caerulus ore,
  8. Acis erat. Sed sic quoque erat tamen Acis, in amnem
  9. versus, et antiquum tenuerunt flumina nomen.”
  10. Desierat Galatea loqui, coetuque soluto
  11. discedunt placidisque natant Nereides undis.
  12. Scylla redit (neque enim medio se credere ponto
  13. audet) et aut bibula sine vestibus errat harena,
  14. aut, ubi lassata est, seductos nacta recessus
  15. gurgitis, inclusa sua membra refrigerat unda.
  16. Ecce fretum scindens alti novus incola ponti,
  17. nuper in Euboica versis Anthedone membris,
  18. Glaucus adest visaeque cupidine virginis haeret
  19. et quaecumque putat fugientem posse morari
  20. verba refert; fugit illa tamen veloxque timore