Satires

Horace

Horace. The Works of Horace. Vol. II. Smart, Christopher, editor. Philadelphia: J. Whetham, 1836.

  1. in pace, ut sapiens, aptarit idonea bello?
  2. quo magis his credas, puer hunc ego parvus Ofellum
  3. integris opibus novi non latius usum
  4. quam nunc accisis. videas metato in agello
  5. cum pecore et gnatis fortem mercede colonum
  6. ‘non ego’ narrantem ‘temere edi luce profesta
  7. quicquam praeter holus fumosae cum pede pernae.
  8. ac mihi seu longum post tempus venerat hospes
  9. sive operum vacuo gratus conviva per imbrem
  10. vicinus, bene erat non piscibus urbe petitis,
  11. sed pullo atque haedo; tum pensilis uva secundas
  12. et nux ornabat mensas cum duplice ficu.
  13. post hoc ludus erat culpa potare magistra
  14. ac venerata Ceres, ita culmo surgeret alto,
  15. explicuit vino contractae seria frontis.
  16. saeviat atque novos moveat fortuna tumultus:
  17. quantum hinc inminuet? quanto aut ego parcius aut vos,
  18. o pueri, nituistis, ut huc novus incola venit?