Satires

Horace

Horace. The Works of Horace. Vol. II. Smart, Christopher, editor. Philadelphia: J. Whetham, 1836.

  1. ambulat et Caprius, rauci male cumque libellis,
  2. magnus uterque timor latronibus; at bene siquis
  3. et vivat puris manibus, contemnat utrumque.
  4. ut sis tu similis Coeli Birrique latronum,
  5. non ego sim Capri neque Sulci: cur metuas me?
  6. nulla taberna meos habeat neque pila libellos,
  7. quis manus insudet volgi Hermogenisque Tigelli,
  8. nec recito cuiquam nisi amicis idque coactus,
  9. non ubivis coramve quibuslibet. in medio qui
  10. scripta foro recitent, sunt multi quique lavantes:
  11. suave locus voci resonat conclusus. inanis
  12. hoc iuvat, haud illud quaerentis, num sine sensu,
  13. tempore num faciant alieno. ‘laedere gaudes’
  14. inquit ‘et hoc studio pravus facis.’ unde petitum
  15. hoc in me iacis? est auctor quis denique eorum,
  16. vixi cum quibus? absentem qui rodit, amicum
  17. qui non defendit alio culpante, solutos
  18. qui captat risus hominum famamque dicacis,
  19. fingere qui non visa potest, conmissa tacere
  20. qui nequit: hic niger est, hunc tu, Romane, caveto.