Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. Dardaniae: fuimus Troes, fuit Ilium et ingens
  2. gloria Teucrorum; ferus omnia Iuppiter Argos
  3. transtulit; incensa Danai dominantur in urbe.
  4. Arduus armatos mediis in moenibus adstans
  5. fundit equus, victorque Sinon incendia miscet
  6. insultans; portis alii bipatentibus adsunt,
  7. milia quot magnis umquam venere Mycenis;
  8. obsedere alii telis angusta viarum
  9. oppositi; stat ferri acies mucrone corusco
  10. stricta, parata neci; vix primi proelia temptant
  11. portarum vigiles, et caeco Marte resistunt.
  12. Talibus Othryadae dictis et numine divom
  13. in flammas et in arma feror, quo tristis Erinys,
  14. quo fremitus vocat et sublatus ad aethera clamor.
  15. Addunt se socios Rhipeus et maximus armis
  16. Epytus oblati per lunam Hypanisque Dymasque,
  17. et lateri adglomerant nostro, iuvenisque Coroebus,
  18. Mygdonides: illis ad Troiam forte diebus
  19. venerat, insano Cassandrae incensus amore,
  20. et gener auxilium Priamo Phrygibusque ferebat,