Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. infelix, qui non sponsae praecepta furentis
  2. audierit.
  3. Quos ubi confertos audere in proelia vidi,
  4. incipio super his: Iuvenes, fortissima frustra
  5. pectora, si vobis audentem extrema cupido
  6. certa sequi, quae sit rebus fortuna videtis:
  7. excessere omnes, adytis arisque relictis,
  8. di, quibus imperium hoc steterat; succurritis urbi
  9. incensae; moriamur et in media arma ruamus.
  10. Una salus victis, nullam sperare salutem.
  11. Sic animis iuvenum furor additus: inde, lupi ceu
  12. raptores atra in nebula, quos improba ventris
  13. exegit caecos rabies, catulique relicti
  14. faucibus exspectant siccis, per tela, per hostis
  15. vadimus haud dubiam in mortem, mediaeque tenemus
  16. urbis iter; nox atra cava circumvolat umbra.
  17. Quis cladem illius noctis, quis funera fando
  18. explicet, aut possit lacrimis aequare labores?
  19. Urbs antiqua ruit, multos dominata per annos;
  20. plurima perque vias sternuntur inertia passim