Alethia

Victor, Claudius Marius

Victor, Claudius Marius. Saint. Poetae Christiani Minores, Pars I (Corpus scriptorum ecclesiasticorum latinorum, Volume 16, Part 1). Petschenig, Michael, editor; Ellis, Robinson, editor; Brandes, Wilhelm, editor; Schenkl, Karl, editor. Vienna, Leipzig, Prague: Tempsky, Freytag, 1888.

  1. inmersumque metu latebris ac paene sepultum
  2. euocat et reuocat. ne longa exempla petantur:
  3. ipsa probat dominum mitem donatio culpae.
  4. Postquam excussa reos distinxit quaestio summos,
  5. incipit omnipotens — caelum, mare, terra loquenti
  6. intremit et uastos pandit concussa recessus,
  7. dumque reos punit sententia, Tartara fecit —:
  8. \'quandoquidem nostris tutum decedere iussis
  9. duxistis, serie sceleris qua culpa cucurrit,
  10. hac mihi iusta nouos feriet censura nocentes.
  11. inter cuncta, frui toto quae iussimus orbe, [*]( Gen. 3, 14 )
  12. tu maledictus eris et peior, quam tegis intus,
  13. inuida mens, coluber, qui caelum intrare creatos
  14. deiecisti homines uetitasque attingere fruges
  15. fraude tua inpulsis praedurae mortis origo es.
  16. ut condigna nefas poenae mensura sequatur —
  17. inmersisti homines terrae: et tu stratus iniquo
  18. membra solo duram sulcabis pectore terram;
  19. fecisti peccare cibis: pro talibus ausis
  20. et tu semper edes squalentia uiscera terrae.