Epistulae

Ausonius, Decimus Magnus

Ausonius, Decimus Magnus. Ausonius, Volume 2. Evelyn-White, Hugh G. (Hugh Gerard), editor. London, Cambridge, MA: William Heinemann, Ltd.; Harvard University Press, 1921.

  1. Isiacos agitant Mareotica sistra tumultus
  2. nec Dodonaci cessat tinnitus aeni,
  3. in numerum quotiens radiis ferientibus ictae
  4. respondent dociles modulato verbere pelves.
  5. Tu velut Oebaliis habites taciturnus Amyclis
  6. aut tua Sigalion Aegyptius oscula signet,
  7. obnixum, Pauline, taces, agnosco pudorem,
  8. quod vitium fovet ipsa suum cessatio iugis,
  9. dumque pudet tacuisse diu, placet officiorum
  10. non servare vices; et amant longa otia culpam,
  11. quis prohibet Salve atque Vale brevitate parata
  12. scribere felicesque notas mandare libellis?
  13. non ego, longinquos ut texat pagina versus,
  14. postulo multiplicique oneret sermone tabellas.