Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. Haec memorat. tum propulso munimine ualli
  2. fossarum rapuere moras, aciemque locorum
  3. consilio curuis accommodat ordine ripis.
  4. barbaricus laeuo stetit ad certamina cornu
  5. bellator Nasamon unaque immanior artus
  6. Marmarides, tum Maurus atrox Garamasque Macesque
  7. et Massylae acies et ferro uiuere laetum
  8. uulgus Adyrmachidae pariter, gens accola Nili,
  9. corpora ab immodico seruans nigrantia Phoebo.
  10. quis positum agminibus caput imperiumque Nealces.
  11. at parte in dextra, sinuat qua flexibus undam
  12. Aufidus et curuo circum errat gurgite ripas,
  13. Mago regit. subiere leues, quos horrida misit
  14. Pyrene, populi et uario cinxere tumultu
  15. flumineum latus: effulget caetrata iuuentus,
  16. Cantaber ante alios nec tectus tempora Vasco
  17. ac torto miscens Baliaris proelia plumbo
  18. Baetigenaeque uiri. celsus media ipse coercet
  19. agmina, quae patrio firmauit milite quaeque
  20. Celtarum Eridano perfusis saepe cateruis.