Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. attollit mitique manu intra limina ducit.
  2. atque ubi iam casus aduersorumque pauorem
  3. hospitii leniuit honos, tum discere maesta
  4. exposcit cura letum infelicis Elissae.
  5. cui sic uerba trahens largis cum fletibus Anna
  6. incipit et blandas addit pro tempore uoces:
  7. ‘Nate dea, solus regni lucisque fuisti
  8. germanae tu causa meae: mors testis et ille
  9. (heu cur non idem mihi tum!) rogus. ora uidere
  10. postquam est ereptum miserae tua, litore sedit
  11. interdum, stetit interdum, uentosque secuta
  12. infelix oculis magno clamore uocabat
  13. Aenean comitemque tuae se imponere solam
  14. orabat paterere rati. mox turbida anhelum
  15. rettulit in thalamos cursum subitoque tremore
  16. substitit et sacrum timuit tetigisse cubile.
  17. inde amens nunc sideream fulgentis Iuli
  18. effigiem fouet amplexu, nunc tota repente
  19. ad uultus conuersa tuos, ab imagine pendet
  20. conqueriturque tibi et sperat responsa remitti.