Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. hic uero ut, gliscente malo et quassantibus aegra
  2. armentis capita, adiutae pinguescere flammae
  3. coepere et uincens fumos erumpere uertex,
  4. per collis dumosque (lues agit atra) per altos
  5. saxosi scopulos montis lymphata feruntur
  6. corpora anhela boum, atque obsessis naribus igni
  7. luctantur frustra rabidi mugire iuuenci.
  8. per iuga, per uallis errat Vulcania pestis
  9. nusquam stante malo, uicinaque litora fulgent:
  10. quam multa adfixus caelo sub nocte serena
  11. fluctibus e mediis sulcator nauita ponti
  12. astra uidet, quam multa uidet, feruoribus atris
  13. cum Calabros urunt ad pinguia pabula saltus,
  14. uertice Gargani residens incendia pastor.
  15. At facie subita uolitantum montibus altis
  16. flammarum, quis tunc cecidit custodia sorti,