Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. maiores umbrae. rapida iam subdita peste
  2. uirgulta atque altis surgunt e cornibus ignes.
  3. hic uero ut, gliscente malo et quassantibus aegra
  4. armentis capita, adiutae pinguescere flammae
  5. coepere et uincens fumos erumpere uertex,
  6. per collis dumosque (lues agit atra) per altos
  7. saxosi scopulos montis lymphata feruntur
  8. corpora anhela boum, atque obsessis naribus igni
  9. luctantur frustra rabidi mugire iuuenci.
  10. per iuga, per uallis errat Vulcania pestis
  11. nusquam stante malo, uicinaque litora fulgent:
  12. quam multa adfixus caelo sub nocte serena
  13. fluctibus e mediis sulcator nauita ponti
  14. astra uidet, quam multa uidet, feruoribus atris
  15. cum Calabros urunt ad pinguia pabula saltus,
  16. uertice Gargani residens incendia pastor.
  17. At facie subita uolitantum montibus altis
  18. flammarum, quis tunc cecidit custodia sorti,
  19. horrere atque ipsos nullo spargente uagari
  20. credere et indomitos pasci sub collibus ignes.