Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. Contra pulchra suos uocat ad discrimina consul:
  2. ‘Hostem, miles, habes fractum ambustumque niuosis
  3. cautibus atque aegre torpentia membra trahentem.
  4. en age, qui sacros montis rupesque profundas
  5. transiluit, discat quanto stet celsius arce
  6. Herculea uallum, et maius sit scandere collis
  7. an uestros rupisse globos. det inania famae,
  8. dum magna fuso pugna retroque ruenti,
  9. qua uentum est, obstent Alpes. super ardua ductum
  10. huc egere dei, Latios ut sanguine finis
  11. imbueret, tellusque hostilis conderet ossa.
  12. scire libet, noua nunc nobis atque altera bellum
  13. Carthago, anne eadem mittat, quae mersa sub aequor
  14. Aegatis inter uasto iacet obruta ponto.’
  15. Haec ait atque agmen Ticini flectit ad undas.
  16. caeruleas Ticinus aquas et stagna uadoso
  17. perspicuus seruat turbari nescia fundo
  18. ac nitidum uiridi lente trahit amne liquorem.
  19. uix credas labi: ripis tam mitis opacis
  20. argutos inter uolucrum certamine cantus