Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. et metui peperere manu. mox impia bella
  2. Tarpeius pater et capti sensere Quirites.
  3. hic dum sollicitat donis et inania corda
  4. ac fluxam morum gentem fouet armaque iungit,
  5. iam consul uolucri praeuectus litora classe
  6. Scipio Phocaicis sese referebat ab oris,
  7. ingentisque duces, pelagi terraeque laborem
  8. diuersum emensos, propiora pericula uallo
  9. iungebant, magnaeque aderant primordia cladis.
  10. namque ut, conlatis admoto consule castris,
  11. sustulerat Fortuna moras, signumque furoris
  12. accensae uiso poscebant hoste cohortes:
  13. †debellata procul, quaecumque uocantur Hiberis,
  14. ingenti Tyrius numerosa per agmina ductor
  15. uoce sonat: non Pyrenen Rhodanumue ferocem
  16. iussa aspernatos, Rutulam fumasse Saguntum,
  17. raptum per Celtas iter, et, qua ponere gressum
  18. Amphitryoniadae fuerit labor, isse sub armis
  19. Poenorum turmas, equitemque per ardua uectum
  20. insultasse iugo, et fremuisse hinnitibus Alpes.