Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. apparet campo limes. metit agmina tectus
  2. caelesti clipeo et sternit super arma iacentum
  3. corporaque auctorem teli multasque paternos
  4. ante oculos animas, optata piacula, mactat.
  5. tunc rapta propere duris ex ossibus hasta
  6. innixum ceruice ferens umeroque parentem
  7. emicat. attonitae tanta ad spectacula turmae
  8. tela tenent, ceditque loco Libys asper, et omnis
  9. late cedit Hiber, pietasque insignis et aetas
  10. belligeris fecit miranda silentia campis.
  11. tum celso e curru Mauors ‘Carthaginis arces
  12. excindes’ inquit ‘Tyriosque ad foedera coges.
  13. nulla tamen longo tanta exorietur in aeuo
  14. lux tibi, care puer. macte, o macte indole sacra,