Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. loricam, nulli tegimen penetrabile telo.
  2. haec, aere et duri chalybis perfecta metallo
  3. atque opibus perfusa Tagi, per singula laetis
  4. lustrat ouans oculis et gaudet origine regni.
  5. Condebat primae Dido Carthaginis arces,
  6. instabatque operi subducta classe iuuentus.
  7. molibus hi claudunt portus, his tecta domosque
  8. partiris, iustae Bitia uenerande senectae.
  9. ostentant caput effossa tellure repertum
  10. bellatoris equi atque omen clamore salutant.
  11. has inter species orbatum classe suisque
  12. Aenean pulsum pelago dextraque precantem
  13. cernere erat: fronte hunc auide regina serena
  14. infelix ac iam uultu spectabat amico.
  15. hinc et speluncam furtiuaque foedera amantum
  16. Callaicae fecere manus: it clamor ad auras
  17. latratusque canum, subitoque exterrita nimbo
  18. occultant alae uenantum corpora siluis.
  19. nec procul Aeneadum uacuo iam litore classis
  20. aequora nequiquam reuocante petebat Elissa.