Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. hic miser, igniferam dum uentilat aere pinum,
  2. murali saxo per lubrica sanguine transtra
  3. uoluitur in fluctus Lycchaei uulnere Cydnus.
  4. fax nidore graui foedauit comminus auras
  5. ambusto instridens pelago. ferus inde citatum
  6. missile adorata contorquet Sabratha puppe
  7. (Hammon numen erat Libycae gentile carinae
  8. cornigeraque sedens spectabat caerula fronte):
  9. Fer, pater, adflictis, fer, ait ‘Garamantice uates,
  10. rebus opem inque Italos da certa effundere tela.’
  11. has inter uoces tremulo uenit agmine cornus
  12. et Neptunicolae transuerberat ora Telonis.
  13. Vrgebant nihilo leuius iam in limine mortis,
  14. quos fuga praecipitis partem glomerarat in unam
  15. puppis, adhuc uacuam taedae. sed, proxima cursu
  16. fulmineo populatus, ineuitabilis ardor
  17. correptam flammis inuoluit ouantibus alnum.
  18. primus, ope aequorei funis delapsus in undas,
  19. qua nondum Stygios glomerabat Mulciber aestus,
  20. ambustus socium remis aufertur Himilco.