Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. imperio Iouis Elysias deduxit in oras
  2. attribuitque paris sedes, ubi magna moratur
  3. Alcidae genetrix, ubi sacro munere Leda.
  4. uerum age, nate, tuos ortus, ne bella pauescas
  5. ulla nec in caelum dubites te attollere factis,
  6. quando aperire datur nobis, nunc denique disce.
  7. sola die caperem medio cum forte petitos
  8. ad requiem somnos, subitus mihi membra ligauit
  9. amplexus, non ille meo ueniente marito
  10. adsuetus facilisque mihi. tum luce corusca,
  11. implebat quamquam languentia lumina somnus,
  12. uidi, crede, Iouem. nec me mutata fefellit
  13. forma dei, quod squalentem conuersus in anguem
  14. ingenti traxit curuata uolumina gyro.
  15. sed mihi post partum non ultra ducere uitam
  16. concessum. heu, quantum gemui, quod spiritus ante
  17. haec tibi quam noscenda darem discessit in auras!’
  18. his alacer colla amplexu materna petebat,
  19. umbraque ter frustra per inane petita fefellit.