Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. audet adire ferum, dum fractis mille catenis
  2. uiperea latrans circumligat ilia cauda.
  3. Dextra uasta comas nemorosaque brachia fundit
  4. taxus Cocyti rigua frondosior unda.
  5. hic dirae uolucres pastusque cadauere uultur
  6. et multus bubo ac sparsis strix sanguine pennis
  7. Harpyiaeque fouent nidos atque omnibus haerent
  8. condensae foliis: saeuit stridoribus arbor.
  9. has inter formas coniunx Iunonis Auernae
  10. suggestu residens cognoscit crimina regum.
  11. stant uincti, seroque piget sub iudice culpae:
  12. circum errant Furiae Poenarumque omnis imago.
  13. quam uellent numquam sceptris fulsisse superbis!
  14. insultant duro imperio non digna nec aequa
  15. ad superos passi manes, quaeque ante profari
  16. non licitum uiuis, tandem permissa queruntur.
  17. tunc alius saeuis religatur rupe catenis,
  18. ast alius subigit saxum contra ardua montis,
  19. uipereo domat hunc aeterna Megaera flagello.