Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. hanc agreste Capys donum, cum moenia sulco
  2. signaret, grato paruae mollitus amore
  3. nutrierat sensusque hominis donarat alendo.
  4. inde exuta feram docilisque accedere mensis
  5. atque ultro blanda attactu gaudebat erili.
  6. aurato matres adsuetae pectine mitem
  7. comere et umenti fluuio reuocare colorem.
  8. numen erat iam cerua loci, famulamque Dianae
  9. credebant, ac tura deum de more dabantur.
  10. haec aeui uitaeque tenax felixque senectam
  11. mille indefessos uiridem duxisse per annos
  12. saeclorum numero Troianis condita tecta
  13. aequabat. sed iam longo nox uenerat aeuo.
  14. nam, subito incursu saeuorum agitata luporum
  15. qui noctis tenebris urbem (miserabile bello
  16. prodigium) intrarant, primos ad luminis ortus
  17. extulerat sese portis pauidaque petebat
  18. consternata fuga positos ad moenia campos.
  19. exceptam laeto iuuenum certamine ductor
  20. mactat, diua, tibi (tibi enim haec gratissima sacra)