Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. Ascraeo famaue seni.’ sic Phoebus, et Hosto
  2. ultrix per geminum transcurrit tempus harundo.
  3. uertuntur iuuenis casu perculsa per agros
  4. agmina, et effusae pariter dant terga cateruae.
  5. tum pater audita nati nece turbidus irae
  6. barbaricum atque immane gemens transfigit anhelum
  7. pectus et ad manis urget uestigia nati.
  8. At Libyae ductor, Marcello fractus et acri
  9. contusus pugna, campos damnarat et arma:
  10. uerterat ad miseras non aequi Martis Acerras.
  11. inde, ubi permisit flammis atque ensibus urbem,
  12. Nuceriae nihilo leuior nec parcior ira
  13. incussit sese atque aequauit moenia terrae.
  14. post Casilina sibi multum obluctatus iniquis
  15. defendentum armis aegre reserauerat astu
  16. limina et obsessis uitam pensauerat auro.
  17. iamque in Dauniacos transfundens agmina campos
  18. flectebat rabiem quo praeda uel ira uocasset.
  19. fumabat uersis incensa Petilia tectis,
  20. infelix fidei miseraeque secunda Sagunto,