Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. nuntio. pugnatum superis in uota secundis.
  2. est locus, Aetoli signat quem gloria regis,
  3. possessus quondam prisca inter saecula Dauno.
  4. umentis rapido circumdat gurgite campos
  5. Aufidus et stagnis intercipit arua refusis,
  6. mox fluctus ferit Hadriacos magnoque fragore
  7. cedentem impellit retrorsus in aequora pontum.
  8. hic Varro et magnum Latia inter nomina Paulus
  9. nomen, quis rerum ducibus permissa potestas,
  10. uixdum depulsa nigrae caligine noctis
  11. inuadunt campum et late fulgentibus armis
  12. accendunt ultro lucem surgentis Eoi.