Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. iam uero, Eridani tumidissimus accola, Celtae
  2. incubuere malis Italum ueteresque doloris
  3. tota se socios properarunt iungere mole.
  4. Sed fas id Celtis, fas impia bella referre
  5. Boiorum fuerit populis: Capuaene furorem,
  6. quem Senonum genti, placuisse, et Dardana ab ortu
  7. moenia barbarico Nomadum sociata tyranno
  8. quisnam mutato tantum nunc tempore credat?
  9. luxus et insanis nutrita ignauia lustris
  10. consumptusque pudor peccando unisque relictus
  11. diuitiis probrosus honor lacerabat hiantem
  12. desidia populum ac resolutam legibus urbem.
  13. insuper exitio truculenta superbia agebat.
  14. nec uitiis deerant uires. non largior ulli
  15. Ausoniae populo (sic tum Fortuna fouebat)
  16. aurique argentique modus; madefacta ueneno
  17. Assyrio maribus uestis medioque dierum
  18. regales epulae atque ortu conuiuia solis
  19. deprensa et nulla macula non inlita uita.
  20. tum populo saeui patres, plebesque senatus