Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. Marmarico ponam tentoria mixtus alumno,
  2. ductoremque feram, cui nunc pro foedere proque
  3. iustitia est ensis solaeque e sanguine laudes?
  4. non ita, non Decio permixtum fasque nefasque,
  5. haec ut uelle queat. nullo nos inuida tanto
  6. armauit Natura bono, quam ianua mortis
  7. quod patet et uita non aequa exire potestas.’
  8. Haec uana auersas Decius iactauit ad auris.
  9. ast delecta manus iungebat foedera Poeno.
  10. iamque aderat praemissa duci turbante tumultu
  11. Autololes numerosa cohors. ipse agmine magno
  12. festinata citus per campos signa mouebat.
  13. et Decius: ‘Nunc hora, uiri, nunc tempus. adeste,
  14. dum Capua dignum, dum me duce dextera uindex
  15. molitur facinus: procumbat barbara pubes.
  16. pro se quisque alacres rapite hoc decus. hostis adire
  17. si parat, obstructas praebete cadauere portas
  18. et ferro purgate nefas. hic denique solus
  19. eluerit sanguis maculatas crimine mentes.’
  20. Dumque ea nequiquam non ulli laeta profatur,