Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. proelia pro Rutulis, nunc signa aciemque mouere,
  2. dum trepidae res, et medicinam uulnera poscunt:
  3. is locus officio, cum cessant prospera, cumque
  4. dura ad opem Fortuna uocat. nam laeta fouere
  5. haud quaquam magni est animi decus. huc, age, adeste.
  6. noui dis animas similes et pectora magnis
  7. numquam angusta malis. capiunt, mihi credite, Cannas
  8. et Trasimenna uada et Pauli memorabile letum.
  9. hi sunt qui uestris infixum moenibus hostem
  10. deiecere manu et Capuam eripuere superbis
  11. Samnitum iussis. hi sunt qui iura dedere
  12. terrore expulso Sidicinaque bella remorunt.
  13. quos fugitis socios? quosue additis? ille ego sanguis
  14. Dardanius, cui sacra pater, cui nomina liquit
  15. ab Ioue ducta Capys magno cognatus Iulo,
  16. ille ego semihomines inter Nasamonas et inter
  17. saeuum atque aequantem ritus Garamanta ferarum
  18. Marmarico ponam tentoria mixtus alumno,
  19. ductoremque feram, cui nunc pro foedere proque
  20. iustitia est ensis solaeque e sanguine laudes?