Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. sit metuenda lues, muros haud fregerit umquam
  2. exultare leuis nudato corpore Maurus.’
  3. Dum Fabius lapsas acuit formidine mentes,
  4. Varronem aduentare uagus per moenia rumor
  5. spargit et occulto perfundit pectora motu:
  6. haud secus ac, fractae rector si forte carinae
  7. litoribus solus uacuis ex aequore sospes
  8. adnatet, incerti trepidant, tendantne negentne
  9. iactato dextras, ipsamque odere salutem
  10. unius amissa superantis puppe magistri.
  11. quam restare uiro labem, qui accedere portis
  12. audeat ac dirum ueniat pauitantibus omen!
  13. Hos mulcens questus Fabius deforme docebat
  14. cladibus irasci uulgumque arcebat ab ira.
  15. aduersis etenim ferri non esse uirorum
  16. qui Martem inscribant genti, non posse dolores
  17. condere et ex poena solacia poscere luctus.
  18. si uero exprobrare sinant, sibi tristius illum
  19. inluxisse diem, quo castris uiderit ire
  20. Varronem, quam quo uideat remeare sine armis.