Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. nondum complerat primaeui corporis annos,
  2. una puellarum Laurentum et pignora pacis
  3. inter uirgineas regi tramissa cateruas.
  4. facta uirum sileo. rege haec et foedere et annis
  5. et fluuio spretis mirantem interrita Thybrim
  6. tranauit, frangens undam puerilibus ulnis.
  7. cui si mutasset sexum natura, reuerti
  8. forsan Tyrrhenas tibi non licuisset in oras,
  9. Porsena. sed iuueni, ne sim tibi longior, hinc est
  10. et genus et clara memorandum uirgine nomen.’
  11. Talia dum pandit, uicinus parte sinistra
  12. per subitum erumpit clamor. permixta ruina
  13. inter et arma uirum et lacerata cadauera Pauli
  14. eruerant corpus media de strage iacentum.
  15. heu quis erat! quam non similis modo Punica telis
  16. agmina turbanti, uel cum Taulantia regna
  17. uertit, et Illyrico sunt addita uincla tyranno!