Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. immugit tellus rumpitque horrenda per umbras
  2. sibila; inaccensi flagrant altaribus ignes.
  3. tum magico uolitant cantu per inania manes
  4. exciti, uultusque in marmore sudat Elissae.
  5. Hannibal haec patrio iussu ad penetralia fertur,
  6. ingressique habitus atque ora explorat Hamilcar.
  7. non ille euhantis Massylae palluit iras,
  8. non diros templi ritus aspersaque tabo
  9. limina et audito surgentis carmine flammas.
  10. Olli permulcens genitor caput oscula libat
  11. attollitque animos hortando et talibus implet:
  12. ‘Gens recidiua Phrygum Cadmeae stirpis alumnos
  13. foederibus non aequa premit. si fata negarint
  14. dedecus id patriae nostra depellere dextra,
  15. haec tua sit laus, nate, uelis. age, concipe bella
  16. latura exitium Laurentibus: horreat ortus
  17. iam pubes Tyrrhena tuos, partusque recusent
  18. te surgente, puer, Latiae producere matres.’
  19. his acuit stimulis subicitque haud mollia dictu:
  20. ‘Romanos terra atque undis, ubi competet aetas,