Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. addiderat iam tum puero †patrius furor oscus†
  2. Sarrana prisci Barcae de gente uetustos
  3. a Belo numerabat auos. namque orba marito
  4. cum fugeret Dido famulam Tyron, impia diri
  5. Belides iuuenis uitauerat arma tyranni
  6. et se participem casus sociarat in omnis.
  7. nobilis hoc ortu et dextra spectatus Hamilcar,
  8. ut fari primamque datum distinguere lingua
  9. Hannibali uocem, sollers nutrire furores,
  10. Romanum seuit puerili in pectore bellum.
  11. Vrbe fuit media sacrum genetricis Elissae
  12. manibus et patria Tyriis formidine cultum,
  13. quod taxi circum et piceae squalentibus umbris
  14. abdiderant caelique arcebant lumine, templum.