Epigrammata

Martial

Martial. M. Valerii Martialis Epigrammata. Heraeus, Wilhelm, editor; Borovskij, Jacobus, editor. Stuttgart: Teubner, 1925. Reprinted with corrections in 1976.

  1. An magis astuti derasa est ungue ministri
  2. Brattea, de fulcro quam reor esse tuo?
  3. Illa potest culicem longe sentire volantem
  4. Et minimi pinna papilionis agi;
  5. Exiguae volitat suspensa vapore lucernae
  6. Et leviter fuso rumpitur icta mero.
  7. Hoc linitur sputo Iani caryota Kalendis,
  8. Quam fert cum parco sordidus asse cliens.
  9. Lenta minus gracili crescunt colocasia filo,
  10. Plena magis nimio lilia sole cadunt;
  11. Nec vaga tam tenui discurrit aranea tela,
  12. Tam leve nec bombyx pendulus urguet opus.
  13. Crassior in facie vetulae stat creta Fabullae,
  14. Crassior offensae bulla tumescit aquae;
  15. Fortior et tortos servat vesica capillos
  16. Et mutat Latias spuma Batava comas.
  17. Hac cute Ledaeo vestitur pullus in ovo,
  18. Talia lunata splenia fronte sedent.
  19. Quid tibi cum phiala, ligulam cum mittere possis,
  20. Mittere cum possis vel cocleare mihi,—
  21. Magna nimis loquimur—cocleam cum mittere possis,
  22. Denique cum possis mittere, Paule, nihil?
  1. Archetypum Myos argentum te dicis habere.
  2. Quod sine te factum est, hoc magis archetypum est?
  1. Cum sitis similes paresque vita,
  2. Uxor pessima, pessimus maritus,
  3. Miror, non bene convenire vobis.
  1. Regia pyramidum, Caesar, miracula ride;
  2. Iam tacet Eoum barbara Memphis opus:
  3. Pars quota Parrhasiae labor est Mareoticus aulae?
  4. Clarius in toto nil videt orbe dies.
  5. Septenos pariter credas adsurgere montes,
  6. Thessalicum brevior Pelion Ossa tulit;
  7. Aethera sic intrat, nitidis ut conditus astris
  8. Inferiore tonet nube serenus apex
  9. Et prius arcano satietur numine Phoebi,
  10. Nascentis Circe quam videt ora patris.