Epigrammata

Martial

Martial. M. Valerii Martialis Epigrammata. Heraeus, Wilhelm, editor; Borovskij, Jacobus, editor. Stuttgart: Teubner, 1925. Reprinted with corrections in 1976.

  1. Bis iam paene tibi consul tricensimus instat,
  2. Et numerat paucos vix tua vita dies.
  3. Non bene distuleris videas quae posse negari,
  4. Et solum hoc ducas, quod fuit, esse tuum.
  5. Expectant curaeque catenatique labores,
  6. Gaudia non remanent, sed fugitiva volant.
  7. Haec utraque manu conplexuque adsere toto:
  8. Saepe fluunt imo sic quoque lapsa sinu.
  9. Non est, crede mihi, sapientis dicere 'Vivam':
  10. Sera nimis vita est crastina: vive hodie.
  1. Sunt bona, sunt quaedam mediocria, sunt mala plura
  2. Quae legis hic: aliter non fit, Avite, liber.
  1. Cogit me Titus actitare causas
  2. Et dicit mihi saepe 'Magna res est.'
  3. Res magna est, Tite, quam facit colonus.
  1. Quid te, Tucca, iuvat vetulo miscere Falerno
  2. In Vaticanis condita musta cadis?
  3. Quid tantum fecere boni tibi pessima vina?
  4. Aut quid fecerunt optima vina mali?
  5. De nobis facile est, scelus est iugulare Falernum
  6. Et dare Campano toxica saeva mero.
  7. Convivae meruere tui fortasse perire:
  8. Amphora non meruit tam pretiosa mori.
  1. Si memini, fuerant tibi quattuor, Aelia, dentes:
  2. Expulit una duos tussis et una duos.
  3. Iam secura potes totis tussire diebus:
  4. Nil istic quod agat tertia tussis habet.
  1. Dic mihi, quis furor est? turba spectante vocata
  2. Solus boletos, Caeciliane, voras.
  3. Quid dignum tanto tibi ventre gulaque precabor?
  4. Boletum qualem Claudius edit, edas.
  1. Cum peteret regem, decepta satellite dextra
  2. Ingessit sacris se peritura focis.
  3. Sed tam saeva pius miracula non tulit hostis
  4. Et raptum flammis iussit abire virum:
  5. Urere quam potuit contempto Mucius igne,
  6. Hanc spectare manum Porsena non potuit.
  7. Maior deceptae fama est et gloria dextrae:
  8. Si non errasset, fecerat illa minus.
  1. Quid nunc saeva fugis placidi lepus ora leonis?
  2. Frangere tam parvas non didicere feras.
  3. Servantur magnis isti cervicibus ungues
  4. Nec gaudet tenui sanguine tanta sitis.
  5. Praeda canum lepus est, vastos non implet hiatus
  6. Non timeat Dacus Caesaris arma puer.
  1. Invitas nullum nisi cum quo, Cotta, lavaris
  2. Et dant convivam balnea sola tibi.
  3. Mirabar, quare numquam me, Cotta, vocasses:
  4. Iam scio, me nudum displicuisse tibi.
  1. Aspicis incomptis illum, Deciane, capillis,
  2. Cuius et ipse times triste supercilium,
  3. Qui loquitur Curios adsertoresque Camillos?
  4. Nolito fronti credere: nupsit heri.
  1. Ede tuos tandem populo, Faustine, libellos
  2. Et cultum docto pectore profer opus,
  3. Quod nec Cecropiae damnent Pandionis arces
  4. Nec sileant nostri praetereantque senes.
  5. Ante fores stantem dubitas admittere Famam
  6. Teque piget curae praemia ferre tuae?
  7. Post te victurae per te quoque vivere chartae
  8. Incipiant: cineri gloria sera venit.
  1. Sextiliane, bibis quantum subsellia quinque
  2. Solus: aqua totiens ebrius esse potes;
  3. Nec consessorum vicina nomismata tantum,
  4. Aera sed a cuneis ulteriora petis.
  5. Non haec Paelignis agitur vindemia prelis
  6. Uva nec in Tuscis nascitur ista iugis,
  7. Testa sed antiqui felix siccatur Opimi,
  8. Egerit et nigros Massica cella cados.
  9. A copone tibi faex Laletana petatur,
  10. Si plus quam decies, Sextiliane, bibis.
  1. Hesterna tibi nocte dixeramus,
  2. Quincunces puto post decem peractos,
  3. Cenares hodie, Procille, mecum.
  4. Tu factam tibi rem statim putasti
  5. Et non sobria verba subnotasti
  6. Exemplo nimium periculoso:
  7. Μισῶ μνάμονα συμπόταν, Procille.
  1. Hesterno fetere mero qui credit Acerram,
  2. Fallitur: in lucem semper Acerra bibit.
  1. Fama refert nostros te, Fidentine, libellos
  2. Non aliter populo quam recitare tuos.
  3. Si mea vis dici, gratis tibi carmina mittam:
  4. Si dici tua vis, hoc eme, ne mea sint.
  1. Chirurgus fuerat, nunc est vispillo Diaulus.
  2. Coepit quo poterat clinicus esse modo.
  1. Hos tibi, Phoebe, vovet totos a vertice crines
  2. Encolpos, domini centurionis amor,
  3. Grata Pudens meriti tulerit cum praemia pili.
  4. Quam primum longas, Phoebe, recide comas,
  5. Dum nulla teneri sordent lanugine voltus
  6. Dumque decent fusae lactea colla iubae;
  7. Utque tuis longum dominusque puerque fruantur
  8. Muneribus, tonsum fac cito, sero virum.
  1. Non amo te, Sabidi, nec possum dicere quare:
  2. Hoc tantum possum dicere, non amo te.
  1. Amissum non flet cum sola est Gellia patrem,
  2. Si quis adest, iussae prosiliunt lacrimae.
  3. Non luget quisquis laudari, Gellia, quaerit,
  4. Ille dolet vere, qui sine teste dolet.
  1. Incustoditis et apertis, Lesbia, semper
  2. Liminibus peccas nec tua furta tegis,
  3. Et plus spectator quam te delectat adulter
  4. Nec sunt grata tibi gaudia si qua latent.
  5. At meretrix abigit testem veloque seraque
  6. Raraque Submemmi fornice rima patet.
  7. A Chione saltem vel ab Iade disce pudorem:
  8. Abscondunt spurcas et monumenta lupas.
  9. Numquid dura tibi nimium censura videtur?
  10. Deprendi veto te, Lesbia, non futui.
  1. Versus scribere me parum severos
  2. Nec quos praelegat in schola magister,
  3. Corneli, quereris: sed hi libelli,
  4. Tamquam coniugibus suis mariti,
  5. Non possunt sine mentula placere.
  6. Quid si me iubeas talassionem
  7. Verbis dicere non talassionis?
  8. Quis Floralia vestit et stolatum
  9. Permittit meretricibus pudorem?
  10. Lex haec carminibus data est iocosis,
  11. Ne possint, nisi pruriant, iuvare.
  12. Quare deposita severitate
  13. Parcas lusibus et iocis rogamus,
  14. Nec castrare velis meos libellos.
  15. Gallo turpius est nihil Priapo.
  1. Si, Lucane, tibi vel si tibi, Tulle, darentur
  2. Qualia Ledaei fata Lacones habent,
  3. Nobilis haec esset pietatis rixa duobus,
  4. Quod pro fratre mori vellet uterque prior,
  5. Diceret infernas et qui prior isset ad umbras:
  6. 'Vive tuo, frater, tempore, vive meo.'
  1. Ventris onus misero, nec te pudet, excipis auro,
  2. Basse, bibis vitro: carius ergo cacas.
  1. Quem recitas meus est, o Fidentine, libellus:
  2. Sed male cum recitas, incipit esse tuus.
  1. Si quis erit raros inter numerandus amicos,
  2. Quales prisca fides famaque novit anus,
  3. Si quis Cecropiae madidus Latiaeque Minervae
  4. Artibus et vera simplicitate bonus,
  5. Si quis erit recti custos, mirator honesti
  6. Et nihil arcano qui roget ore deos,
  7. Si quis erit magnae subnixus robore mentis:
  8. Dispeream, si non hic Decianus erit.
  1. Qui ducis vultus et non legis ista libenter,
  2. Omnibus invideas, livide, nemo tibi.
  1. Urbanus tibi, Caecili, videris.
  2. Non es, crede mihi. Quid ergo? verna,
  3. Hoc quod transtiberinus ambulator,
  4. Qui pallentia sulphurata fractis
  5. Permutat vitreis, quod otiosae
  6. Vendit qui madidum cicer coronae,
  7. Quod custos dominusque viperarum,
  8. Quod viles pueri salariorum,
  9. Quod fumantia qui tomacla raucus
  10. Circumfert tepidis cocus popinis,
  11. Quod non optimus urbicus poeta,
  12. Quod de Gadibus improbus magister,
  13. Quod bucca est vetuli dicax cinaedi.
  14. Quare desine iam tibi videri,
  15. Quod soli tibi, Caecili, videris,
  16. Qui Gabbam salibus tuis et ipsum
  17. Posses vincere Tettium Caballum.