Saturae

Juvenal

Juvenal. Juvenal and Persius. Ramsay, G. G., editor. London, New York: William Heinemann, G. P. Putnam's Sons, 1918.

  1. an facile et pronum est agere intra viscera penem
  2. legitimum atque illic hesternae occurrere cenae?
  3. servus erit minus ille miser qui foderit agrum,
  4. quam dominum; sed tu sane tenerum et puerum te
  5. et pulchrum et dignum cyatho caeloque putabas,
  6. vos humili adseculae, vos indulgebitis umquam
  7. cultori, iam nec morbo donare parati?
  8. en cui tu viridem umbellam, cui sucina mittas
  9. grandia, natalis quotiens redit aut madidum ver
  10. incipit et strata positus longaque cathedra
  11. munera femineis tractat secreta kalendis.
  12. Dic, passer, cui tot montis, tot praedia servas
  13. Apula, tot milvos intra tua pascua lassos?
  14. te Trifolinus ager fecundis vitibus implet
  15. suspectumque iugum Cumis et Gaurus inanis—
  16. nam quis plura linit victuro dolia musto?—
  17. quantum erat exhausti lumbos donare clientis
  18. iugeribus paucis? meliusne hic[*](For ne hic (PΨ) Housman conjectured nunc.) rusticus infans
  19. cum matre et casulis et conlusore catello
  20. cymbala pulsantis legatum fiet amici?