Saturae

Juvenal

Juvenal. Juvenal and Persius. Ramsay, G. G., editor. London, New York: William Heinemann, G. P. Putnam's Sons, 1918.

  1. cum tenuis nuper Marius discinxerit Afros?
  2. curandum in primis ne magna iniuria fiat
  3. fortibus et miseris, tollas licet omne quod usquam est
  4. auri atque argenti: scutum gladiumque relinques,
  5. et iaculum et galeam spoliatis arma supersunt.
  6. Quod modo proposui, non est sententia: verum est,
  7. credite me vobis folium recitare Sibyllae,
  8. si tibi sancta cohors comitum, si nemo tribunal
  9. vendit acersccomes, si nullum in coniuge crimen
  10. nec per conventus et cuncta per oppida curvis
  11. unguibus ire parat nummos raptura Celaeno,
  12. tum licet a Pico numeres genus, altaque si te
  13. nomina delectant, omnem Titanida pugnam
  14. inter maiores ipsumque Promethea ponas,.
  15. de quocumque voles proavum tibi sumito libro.
  16. quod si praecipitem rapit ambitio atque libido,
  17. si frangis virgas sociorum in sanguine, si te
  18. delectant hebetes lasso lictore secures,
  19. incipit ipsorum contra te stare parentum
  20. nobilitas claramque facem praeferre pudendis.