Saturae

Juvenal

Juvenal. Juvenal and Persius. Ramsay, G. G., editor. London, New York: William Heinemann, G. P. Putnam's Sons, 1918.

  1. cernis ephemeridas, quae nullum consulit et iam
  2. consulitur, quae castra viro patriamque petente
  3. non ibit pariter numeris revocata Thrasylli.
  4. ad primum lapidem vectari cum placet, hora
  5. sumitur ex libro; si prurit frictus ocelli
  6. angulus, inspecta genesi collyria poscit;
  7. aegra licet iaceat, capiendo nulla videtur
  8. aptior hora cibo nisi quam dederit Petosiris.
  9. Si mediocris erit, spatium lustrabit utrimque
  10. metarum et sortes ducet frontemque manumque
  11. praebebit vati crebrum poppysma roganti,
  12. divitibus responsa dabit[*](dabit PG: dabunt FTU.) Phryx augur, et Indus[*](indus Brit. 15 B xvii: inde PςΨ: indi U: Owen and Büch. (1893) Iudae: Housman and Büch. (1910) inde. Housman thinks a line has dropped out.)
  13. conductus, dabit astrorum mundique peritus
  14. atque aliquis senior qui publica fulgura condit:
  15. plebeium in circo positum est et in aggere fatum;
  16. quae nudis longum ostendit cervicibus aurum
  17. consulit ante falas delphinorumque columnas
  18. an saga vendenti nubat caupone relicto.
  19. Hae tamen et partus subeunt discrimen et omnis
  20. nutricis tolerant fortuna urguente labores;