Saturae

Juvenal

Juvenal. Juvenal and Persius. Ramsay, G. G., editor. London, New York: William Heinemann, G. P. Putnam's Sons, 1918.

  1. mullorumque iubis et captatore macello.
  2. quid fieri non posse putes, si iungitur ulla
  3. Vrsidio? si moechorum notissimus olim
  4. stulta maritali iam porrigit ora capistro,
  5. quem totiens texit perituri cista Latini?
  6. quid quod et antiquis uxor de moribus illi
  7. quaeritur? o medici, nimiam pertundite venam,
  8. delicias hominis! Tarpeium limen adora
  9. pronus et auratam Iunoni caede iuvencam,
  10. si tibi contigerit capitis matrona pudici.
  11. paucae adeo Cereris[*](Cereris PΨ: Housman conj. teretis.) vittas contingere dignae,
  12. quarum non timeat pater oscula: necte coronam
  13. postibus et densos per limina tende corymbos.