Saturae

Juvenal

Juvenal. Juvenal and Persius. Ramsay, G. G., editor. London, New York: William Heinemann, G. P. Putnam's Sons, 1918.

  1. mentis causa malae tamen est et origo penes te.
  2. nam quisquis magni census praecepit amorem
  3. et laevo monitu pueros producit avaros
  4. et qui per fraudes patrimonia conduplicari[*](*y omits; Ruperti delete)
  5. dat libertatem et totas effundit habenas
  6. curriculo, quem si revoces, subsistere nescit
  7. et te contempto rapitur metisque relictis.
  8. nemo satis credit tantum delinquere quantum
  9. permittas: adeo indulgent sibi latius ipsi.
  10. Cum dicis iuveni stultum qui donet amico,
  11. qui paupertatem levet attollatque propinqui,
  12. et spoliare doces et circumscribere et omni
  13. crimine divitias adquirere; quarum amor in te
  14. quantus erat patriae Deciorum in pectore, quantum
  15. dilexit Thebas, si Graecia vera, Menoeceus,
  16. in quorum sulcis legiones dentibus anguis
  17. cum clipeis nascuntur et horrida bella capessunt
  18. continuo, tamquam et tubicen surrexerit una.
  19. ergo ignem, cuius scintillas ipse dedisti,
  20. flagrantem late et rapientem cuncta videbis.