Saturae

Juvenal

Juvenal. Juvenal and Persius. Ramsay, G. G., editor. London, New York: William Heinemann, G. P. Putnam's Sons, 1918.

  1. ignoret quantum ferrata distet ab arca
  2. sacculus. e caelo descendit γνῶθι σεαυτόν
  3. figendum et memori tractandum pectore, sive
  4. coniugium quaeras vel sacri in parte senatus
  5. esse velis; neque enim loricam poscit Achillis
  6. Thersites, in qua se traducebat Vlixes;
  7. ancipitem seu tu magno discrimine causam
  8. protegere adfectas, te consule, dic tibi qui sis,
  9. orator vehemens an Curtius et Matho buccae.
  10. noscenda est mensura sui spectandaque rebus
  11. in summis minimisque, etiam cum piscis emetur,
  12. ne mullum cupias, cum sit tibi gobio tantum
  13. in loculis. quis enim te deficiente crumina
  14. et crescente gula manet exitus, aere paterno
  15. ac rebus mersis in ventrem faenoris atque
  16. argenti gravis et pecorum agrorumque capacem?
  17. talibus a dominis post cuncta novissimus exit
  18. anulus, et digito mendicat Pollio nudo.
  19. non praematuri cineres nec funus acerbum
  20. luxuriae, sed morte magis metuenda senectus.