Saturae

Juvenal

Juvenal. Juvenal and Persius. Ramsay, G. G., editor. London, New York: William Heinemann, G. P. Putnam's Sons, 1918.

  1. et gratam requiem dona tibi, quando licebit
  2. per totum cessare diem. non faenoris ulla
  3. mentio nec, prima si luce egressa reverti
  4. nocte solet, tacito bilem tibi contrahat uxor
  5. umida suspectis referens multicia rugis
  6. vexatasque comas et vultum auremque calentem.
  7. protinus ante meum quidquid dolet exue limen,
  8. pone domum et servos et quidquid frangitur illis
  9. aut perit, ingratos ante omnia pone sodales.
  10. Interea Megalesiacae spectacula mappae
  11. Idaeum sollemne colunt, similisque triumpho
  12. praeda caballorum praetor sedet, ac mihi pace
  13. inmensae nimiaeque licet si dicere plebis,
  14. totam hodie Romam circus capit, et fragor aurem
  15. percutit, eventum viridis quo colligo panni.
  16. nam si deficeret, maestam attonitamque videres
  17. hanc urbem veluti Cannarum in pulvere victis
  18. consulibus, spectent iuvenes, quos clamor et audax
  19. sponsio, quos cultae decet assedisse puellae:
  20. nostra bibat vernum contracta cuticula solem